Lausnin kannski fundin!

Hefur nokkur velt því fyrir sér hvað myndi gerast hér á landi ef allir þeir sem tóku lán til íbúðakaupa, eða önnur lán myndu sameinast og bara fara í útrás? (það er voða fínt orð "útrás")  Já ef íbúðaeigendur færu bara frá öllu saman, flyttu til útlanda og þeir þarna sem eru að tala um kreppu og vilja að allir nema þeir dragi nú úr peningaaustri, og hver yrði staða bankanna eða ríkissjóðs?

Það yrði enginn eftir til að halda þeim uppi, hvernig má það vera að endalaust er hægt að segja við hinn almenna launþega í þessu landi að draga úr eyðslu, á sama tíma og ráðherrar geta verið að sinna "gæluverkefnum" í útlöndum?  Væri ekki ráð fyrir okkar ágætu ráðherra að byrja einu sinni sjálfir, sýna að það sé kreppa og ákveða að næsta árið a.m.k. verði ekki farið í nein ferðalög erlendis, heldur skuli notuð nútímatækni og fundir haldnir gegnum netið  (ef fundir erlendis eru nauðsynlegir). 

Sýna nú okkur kjósendum þá virðingu að draga úr eyðslu á okkar skattpeningum.  Það er jú hinn almenni launþegi sem er "ríkið".  En það virðist alltaf vera að það sé láglaunaþegnum þessa lands um að kenna að kreppa sé í landinu, það var ekki hægt að hækka lægstu launin síðast þegar að kreppti, og ekki verða laun hækkuð í þessari kreppu. 13% verðbólga og á eftir að hækka segja fræðingar, stýrivextir munu hækka aftur fljótlega, (Ísland er núþegar með hæstu stýrivexti í heimi) (þeir lækkuðu stýrivexti í usa til að slá á verðbólguna þar, en hún er kannski góðkynja verðbólgan þar í landi). 

Svo á að taka erlent lán til að bjarga bönkunum, (annars fara þeir úr landi, hafa bankamenn víst hótað) og hinn almenni launþegi má því búast við að hækka þurfi skatta til að halda bönkunum í landinu!  (það kemur að því að greiða þurfi af erlenda 500 milljarða láninu) og ekki komum við til með að fá nein afsláttarkjör í bankanum okkar, það er nokkuð öruggt.

Ekki er það heldur heimilin sem græða á falli krónunar, nei ég er viss um að þar eru "bankarnir okkar" að verki til að redda ársfjórðungsuppgjöri sínu, eru þeir með hag viðskiptavinarins í huga, nei nei nei.  En viðskiptavinurinn þarf að greiða svona 30% meira af sínu láni þegar upp er staðið.  Og það kemur í hlut "viðskiptavinar bankans" að greiða erlenda "reddabönkunum-lánið" líka!  

Er þetta ekki farið að snúast um sjálft sig? 

Ég legg til að við skattgreiðendur snúum vörn í sókn, flytjum úr landi sjálf, áður en það er orðið of seint!

Bankarnir fara úr landi það er öruggt.  Og eftir munum við sitja með 500 milljarða lán.